भारतले जित्यो आईसीसी टी-२० विश्वकप २०२६ को उपाधि

काठमाडौँ- आईसीसी टी-२० विश्वकप २०२६ को उपाधि भारतले जितेको छ। भारतको अहमदाबादमा आइतबार भएको फाइनलमा भारतले न्युजिल्यान्डलाई ९६ रनले हराएर उपाधि जितेको हो। अघिल्लो संस्करणको टी-२० विश्वकप पनि भारतले नै जितेको थियो।

आइतबार भएको खेलमा न्युजिल्यान्डले टस जितेर फिल्डिङ रोजेको थियो। पहिले ब्याटिङ गरेको भारतले  २० ओभरमा ५ विकेट गुमाएर २‌ सय ५५ रन बनायो। 

२ सय ५६ रनको लक्ष्य पछ्याएको न्युजिल्यान्ड १९ ओभरमा १ सय ५९ रनमै अलआउट भयो।

भारतका लागि सञ्जु स्यामसनले सर्वाधिक ८९ रन बनाए। ४६ बल‌ खेलेका उनले ८ छक्का र ५ चौका प्रहार गरे । त्यस्तै अभिषेक शर्माले ५२ रन र इशान किशनले ५४ रन बनाए। न्युजिल्यान्डका लागि जेम्स निशमले ३ विकेट लिए।

दोस्रो इनिङमा न्युजिल्यान्डका लागि टिम सिफर्टले ५२ र मिचेल सान्टनरले ४३ रन बनाए पनि जितका लागि पर्याप्त भएन। भारतका जसप्रित बुमराहले ४ विकेट र अक्षर पटेलले ३ विकेट लिए।