नेपालले जापानलाई दियो १५० रनको लक्ष्य

काठमाडौँ- एसियाली खेलकुदअन्तर्गत पुरुष क्रिकेटको समूह चरणमा जापानलाई नेपालले १५० रनको लक्ष्य दिएको छ।

निसिनमा टस हारेर पहिले ब्याटिङ गरेको नेपालले निर्धारित १५ ओभरमा ४ विकेट गुमाएर १४९ रन बनाएको हो। नेपालको इनिङ्समा सन्दीप जोराले ५७ रन बनाए। उनले ३२ बलमा ५ चौका र ३ छक्का प्रहार गरे।

त्यस्तै लोकेश बमले ५२ रनमा अविजित रहे। उनले २२ बलमा १ चौका र ६ छक्का प्रहार गरे। आसिफ शेखले २१ रन बनाए। नेपालका कुशल भुर्तेल ४, कुशल मल्ल २ र गुल्सन झा २ रनमा आउट भए।

जापानका लागि रेओ साकुरानो–थोमस, जेक कुसुडा–नेर्न, डेक्लान सुजुकी र इब्राहिम ताकाहासीले समान एक–एक विकेट लिए।