सर्लाहीमा पोखरीमा डुबेर एक जनाको मृत्यु

काठमाडौँ- सर्लाहीमा पोखरीमा डुबेर एक जनाको मृत्यु भएको छ। सर्लाहीको मलंगवा नगरपालिका– २ स्थित नासी पोखरीमा डुबेर कौडेना गाउँपालिका-२ का २८ वर्षीय प्रेम कुमार यादवको मृत्यु भएको हो।

जिल्ला प्रहरी कार्यालय सर्लाहीका अनुसार बिहीबार दिउँसो करिब १ बजेतिर यादव पोखरीमा डुबेर बेपत्ता भएका थिए। स्थानीयले युवकलाई पोखरीमा डुब्दै गरेको देखेपछि तुरुन्तै प्रहरीलाई खबर गरेका थिए।

त्यसपछि नेपाली सेना, नेपाल प्रहरी र सशस्त्र प्रहरीले संयुक्त रूपमा खोजी कार्य गरेको थियो। खोजीका क्रममा नभेटिएपछि अन्ततः स्थानीयको सहयोगमा माछा मार्ने जाल प्रयोग गरी साँझ करिब साढे ५ बजेतिर शव फेला पारिएको हो।