पहिरो खस्दा कान्ति लोकपथ पूर्ण रूपमा अवरुद्ध

बागमती– हेटौँडा–काठमाडौँ जोड्ने कान्ति लोकपथअन्तर्गत मकवानपुरको भीमफेदी गाउँपालिका–८ गङ्गटेस्थित सडकमा पहिरो खस्दा यातायात अवरुद्ध भएको छ।

वर्षासँगै शुक्रबार बेलुका ५:०० बजेतिर पहिरो खस्दा सडक पूर्ण रूपमा अवरुद्ध भएको जिल्ला प्रहरी कार्यालय मकवानपुरका प्रवक्ता प्रहरी नायब उपरीक्षक पुष्कर बोगटीले जानकारी दिए।

पहिरो खसेको ठाउँमा इलाका प्रहरी कार्यालय ठिङगनबाट प्रहरी टोली खटिएको र पहिरो पन्छाउने प्रयास भइरहेको बोगटीले बताए।

जल तथा मौसम विज्ञान विभागका अनुसार हाल नेपालमा पश्चिमी न्यूनचापीय प्रणाली र स्थानीय वायुको प्रभावका कारण हुरीसहितको वर्षा भइरहेको छ। मकवानपुरको गढी क्षेत्रमा सर्वाधिक वर्षा मापन गरिएको छ।

हुरीबताससहितको वर्षाले यातायात, सञ्चार तथा विद्युत् सेवा प्रभावित भएका छन्। विभागले अत्यावश्यकबाहेकका आवागमन नगर्न र उच्च सतर्कता अपनाउन सर्वसाधारणलाई आग्रह गरेको छ।