हिमाली तथा पहाडी भूभागमा हल्का वर्षा र हिमपातको सम्भावना

काठमाडौँ- हाल नेपालमा पश्चिमी र स्थानीय वायुको साथै पूर्वी नेपाल नजिक रहेको न्यून चापीय प्रणालीको पनि आंशिक प्रभाव रहेको छ।

मौसम पूर्वानुमान महाशाखाका अनुसार आज दिउँसो कोशी प्रदेशलगायत बाँकी पहाडी र हिमाली भूभागमा साधारणतया बादल लाग्ने र तराई भूभागमा आंशिक बादल लाग्नेछ।

कोशी र गण्डकी प्रदेशका हिमाली र पहाडी भूभाग लगायत देशका बाँकी हिमाली भूभागका थोरै स्थानहरूमा तथा बागमती र लुम्बिनी प्रदेशका पहाडी भूभागका एक–दुई स्थानमा मेघगर्जन/चट्याङसहित हल्का वर्षा र हिमपातको सम्भावना रहेको छ। मधेश प्रदेशलगायत बागमती, गण्डकी, लुम्बिनी र सुदूरपश्चिम प्रदेशका तराई साथै उपत्यका र खोँचहरूमा तातो दिन हुने सम्भावना रहेको महाशाखाले जनाएको छ।

आज राति देशका हिमाली भूभागमा साधारणतया बादल लाग्नेछ। त्यस्तै, पहाडी भूभागमा आंशिक बादल लाग्ने र तराई भूभागमा मौसम मुख्यतया सफा रहनेछ। कोशी, गण्डकी र कर्णाली प्रदेशको हिमाली भूभागका एक–दुई स्थानमा हल्का वर्षा र हिमपातको सम्भावना रहेको छ।