नागरिकता त्याग्ने थप १९ चिकित्सकको लाइसेन्स खारेज

काठमाडौँ– नेपाल मेडिकल काउन्सिलले थप १९ जना चिकित्सकको दर्ता प्रमाणपत्र (लाइसेन्स) खारेज गरेको छ। काउन्सिलले नेपाली नागरिकता परित्याग गरेका १९ जना चिकित्सकको लाइसेन्स दर्ता खारेज गरेको काउन्सिलका रजिस्ट्रार डा. सतिशकुमार देवले जानकारी दिए।

यसअघि काउन्सिलले नेपाली नागरिकता त्यागेर विदेशी राहदानी लिएका १७ जनाको लाइसेन्स खारेज गरेको थियो। उनले नेपाली नागरिकता त्यागी विदेशी राहदानी लिएका ती चिकित्सकको लाइसेन्स खारेज गरिएको बताए। उनले ती चिकित्सकको दर्ता किताबबाट नाम समेत हटाइएको जानकारी दिए।

“नेपाल मेडिकल काउन्सिल ऐन २०२०, नियमावली २०२४ र नेपाल नागरिकता ऐन २०६३ अनुसार नेपाली नागरिकता परित्याग गरी विदेशी राहदानी लिएका ती १९ जना चिकित्सकको काउन्सिलको दर्ता किताबबाट नाम खारेज गर्ने निर्णय गरिएको छ,” उनले भने।

ती चिकित्सकले नेपाली नागरिकता त्यागेर बेलायती (ब्रिटिस), क्यानेडियन, अमेरिकी, न्युजिल्यान्ड, जर्मन, अस्ट्रेलियाली र भारतीय नागरिकता लिएकाले दर्ता खारेज गरिएको हो। उनका अनुसार लाइसेन्स खारेज हुनेमा डा. सुमिन्द्रा पुन, डा. शैलेशकुमार जयसवाल, डा. भूपेश खड्का, डा. आरती रानाभाट, डा. रमेशराज पहारी, डा. सञ्जोक घले, डा. ऋषिराज बराल, डा. प्रभु पाण्डे, डा. तृप्ती महर्जन र डा. सृजना श्रेष्ठ रहेका छन्।

यस्तै, लाइसेन्स खारेज हुने अन्य चिकित्सकमा डा. सुनिता विष्ट, डा. दीपा मल्ल, डा. सौरभ जिसी, डा. जेनिसा श्रेष्ठ, डा. प्रभास रेग्मी, डा. दीपिका ज्ञवाली, डा. हेमु चौरसिया, डा. समीक्षा शर्मा र डा. मनोरमा पाण्डे छन्।