अर्घाखाँचीमा बस दुर्घटना हुँदा २ जनाको मृत्यु, २२ घाइते

अर्घाखाँची– अर्घाखाँचीको पाणिनी गाउँपालिका–८, दुर्गाफाँट कुडुलेमा बस दुर्घटना हुँदा दुई जनाको घटनास्थलमै मृत्यु भएको छ। दुर्घटनामा अन्य २२ जना घाइते भएका छन्।

पर्वतबाट अर्घाखाँचीको सुपा देउराली दर्शनका लागि आएको ग १ ख ५०४ नम्बरको बस फर्कने क्रममा अनियन्त्रित भई दुर्घटना भएको जिल्ला प्रहरी कार्यालयका प्रमुख प्रहरी नायब उपरीक्षक (डीएसपी) दिवसबहादुर जिसीले जानकारी दिए। उनका अनुसार अहिले घटनास्थलमा सुरक्षाकर्मी र स्थानीयको सहयोगमा उद्धारकार्य भइरहेको छ।

पाणिनी गाउँपालिकाका पूर्वअध्यक्ष अच्युत गौतमका अनुसार घाइतेहरूलाई थप उपचारका लागि पाल्पा र अर्घाखाँची अस्पताल पठाउने क्रम जारी छ। घटनाको विस्तृत विवरण र मृतकको पहिचान खुल्न बाँकी रहेको प्रहरीले जनाएको छ।