आईसीसी क्रिकेट विश्वकप लिग–२ : नेपालले आज स्कटल्यान्डसँग खेल्दै

काठमाडौँ– नेपालले आईसीसी क्रिकेट विश्वकप लिग–२ अन्तर्गत आज स्कटल्यान्डसँग खेल्दैछ। खेल त्रिवि क्रिकेट रंगशालामा बिहान ९:३० बजे शुरू हुनेछ।

त्रिकोणात्मक शृंखलामा नेपालले स्कटल्यान्डसँगको दोस्रो खेल खेल्न लागेको हो। वर्षाले प्रभावित पहिलो खेलमा नेपाल स्कटल्यान्डसँग डकवर्थ–लुइस पद्धतिका आधारमा २ रनले पराजित भएको थियो। 

विश्वकप लिग–२ को अंक तालिकामा स्कटल्यान्ड पहिलो स्थानमा छ। स्कटल्यान्डले ३० खेलमा १६ जित, ८ हार र ६ खेलमा नतिजाविहीन हुँदै ३८ अंक बनाएको छ। नेपाल २६ खेलमा ९ जित, १५ हार र २ खेलमा नतिजाविहीन हुँदै २० अंकसहित सातौँ स्थानमा छ।

त्रिवि क्रिकेट मैदानमा जारी त्रिकोणात्मक शृंखलामा नेपाल, स्कटल्यान्ड र अमेरिका सहभागी छन्। नेपालले आफ्नो दोस्रो खेलमा भने अमेरिकालाई ९ विकेटले पराजित गरेको थियो।