पर्यटकको दैनिक औसत खर्च १९ प्रतिशतले घट्यो

नेपाल भ्रमणमा आउने पर्यटकको संख्यामा सामान्य वृद्धि भए पनि उनीहरूको दैनिक औसत खर्च गत वर्षको तुलनामा १९ प्रतिशतले घटेको छ।

उकालो

बिहिबार, १४ जेठ, २०८३

पर्यटकको दैनिक औसत खर्च १९ प्रतिशतले घट्यो

काठमाडौँ– नेपाल भ्रमणमा आएका पर्यटकको औसत दैनिक खर्च १९ प्रतिशतले घटेको छ। सरकारद्वारा हालै सार्वजनिक गरिएको आर्थिक सर्वेक्षणले पर्यटक भित्रिए पनि खर्च भने घटेको देखाएको हो।

नेपाल पर्यटन व्यवसायी संघका अध्यक्ष कुमारमणि थपलियाले पर्यटकले खर्च नगर्ने हो भने पर्यटनबाट मुलुक समृद्धिको लक्ष्य हासिल गर्न कठिनाइ हुने बताए। उनका अनुसार नेपाल आउने पर्यटकले यात्रामै बढी खर्च गर्नुपर्ने बाध्यता भएकाले खुलेर खर्च गर्ने अवस्था नरहेको हो। 

“यातायात टिकट नै तीन हजार डलर पुग्छ। यस्तो अवस्थामा पर्यटकले यहाँ आएर प्रशस्त खर्च गर्ने पैसा कटौती हुन्छ”, उनले भने, “हामीले पर्यटकलाई खर्च गराउने वातावरण सिर्जना गर्न सकेका छैनौँ।”

संघका अध्यक्ष थपलियाले पर्यटकलाई खर्च गराउन विलासी प्याकेज (लक्जरियस प्याकेज) को प्रावधान बनाई कार्यान्वयन गर्नुपर्ने आवश्यकता औँल्याए। बाटो सुविधायुक्त बनाउने, खर्च गर्ने कलात्मक संरचना निर्माण गर्ने र ट्राभल शुल्क कम गर्ने हो भने पर्यटकले खर्च गर्ने आधार बढ्ने उनको तर्क छ।

अर्थमन्त्री डा. स्वर्णिम वाग्लेले बुधबार प्रस्तुत गर्नुभएको आर्थिक सर्वेक्षण २०८२/८३ मा गत आर्थिक वर्ष (सन् २०२४) मा ४०.८४ अमेरिकी डलर औसत खर्च गर्ने पर्यटकले सन् २०२५ मा ३३.०८ अमेरिकी डलर मात्रै खर्च गरेका छन्। यस हिसाबले नेपालमा आउने पर्यटकको औसत दैनिक खर्च १९ प्रतिशतले घटेको थपलियाले जानकारी दिए।

सर्वेक्षणका अनुसार सन् २०२५ देखि केन्द्रीय विद्युतीय पर्यटन व्यवस्थापन सूचना प्रणाली (सिटिएमआइएस) बाट अध्यागमन विभागले पर्यटकको आगमन र प्रस्थान मिति प्रविष्ट गरेपछि स्वचालित हिसाबले गणना हुने प्रबन्ध गरिएको छ। यसैकारण पर्यटकको प्रतिदिन औसत खर्चसमेत सोही अनुपातमा घटेको हो। 

सर्वेक्षणले गत वर्षको तुलनामा यस वर्ष नेपाल भित्रिने पर्यटकको सङ्ख्या १.३ प्रतिशतले वृद्धि भई ११ लाख ६२ हजार ३६५ पुगेको देखाएको छ। सन् २०२४ मा ११ लाख ४७ हजार ५४८ पर्यटक भित्रिएका थिए।

नेपालमा भित्रिने पर्यटकमध्ये ६०.२ प्रतिशत बिदा र मनोरञ्जनका लागि आउने गरेका छन्। यसमा पनि सबैभन्दा बढी घुम्न आउने पर्यटकमा तीर्थयात्री १४ दशमलव चार प्रतिशत रहेका तथ्याङ्कले देखाएको संघका अध्यक्ष थपलियाले उल्लेख गरे। उनका अनुसार पदयात्रा र पर्वतारोहणका लागि १४.२ प्रतिशत तथा अन्य प्रयोजन (व्यापार, अध्ययन, भ्रमण वा अन्य विविध) का लागि ११.२ प्रतिशत पर्यटक नेपाल आएका छन्।

यसरी नेपाल भ्रमण गर्ने पर्यटकको बसाइ अवधिसमेत बढेको तथ्याङ्कले देखाउँछ। सन् २०२४ मा प्रतिपर्यटक औसत बसाइ अवधि १३.३० दिन रहेकामा सन् २०२५ मा १६.३४ दिन पुगेको छ। तथ्याङ्कअनुसार सन् २०२५ मा आएका पर्यटकमध्ये भारतबाट करिब दुई लाख ९३ हजार रहेका छन्।

त्यसैगरी अमेरिकाबाट एक लाख १३ हजार, चीनबाट ९६ हजार, बेलायतबाट ५९ हजार, बांग्लादेशबाट ५८ हजार, अस्ट्रेलियाबाट ५० हजार, श्रीलङ्काबाट ३८ हजार, थाइल्यान्डबाट ३० हजार, जर्मनीबाट ३० हजार, जापानबाट २५ हजार र अन्य मुलुकबाट तीन लाख ७१ हजार पर्यटक आएका छन्।

तथ्याङ्कले २०२५ मा भ्रमण आय ४.८ प्रतिशत वृद्धि भएको देखाउँछ। गत आर्थिक वर्षमा पर्यटन क्षेत्रबाट प्राप्त हुने भ्रमण आय ८३ अर्ब ३९ करोड ४० लाख थियो। ठमेल पर्यटन विकास परिषद्का उपाध्यक्ष सहदेव धमलाले पर्यटकले पर्याप्त खर्च गरे मात्रै राज्यको कुल गार्हस्थ्य उत्पादनमा योगदान पुर्‍याउन सकिने बताए। उनका अनुसार अहिले पर्यटकलाई गुणस्तरीय किनमेल गर्ने वस्तुको अभाव छ।

त्यस्तै पर्यटकको चाहनाअनुसारका सेवा प्रवाहमा पनि नेपाल व्यवस्थित हुन आवश्यक रहेको उनले बताए। “सेवा प्रवाह नै बलियो बनाउन र पर्यटकले किनमेल गर्ने गुणस्तरीय वस्तुको उत्पादन गर्न राज्यले लगानीमा जोड दिनुपर्छ”, उनले भने।

प्रतिक्रिया दिनुहोस !