दुग्ध किसानलाई तत्काल भुक्तानी दिन संसद्‍मा माग

सांसदहरूले दुग्ध किसानले लामो समयदेखि दूधको भुक्तानी नपाएको समस्यादेखि कर्णाली राजमार्गको दुर्घटना न्यूनीकरण र सुस्तावासीको भूमिको रक्षासम्मका समसामयिक विषयमा सरकारको ध्यानाकर्षण गराएका छन्।

उकालो

सोमबार, २२ असार, २०८३

दुग्ध किसानलाई तत्काल भुक्तानी दिन संसद्‍मा माग

काठमाडौँ– प्रतिनिधिसभाको आजको बैठकमा सांसदहरूले दुग्ध किसानले समयमा भुक्तानी नपाएकोदेखि कर्णाली राजमार्गको जोखिम न्यूनीकरणलगायत विषयमा सरकारको ध्यानाकर्षण गराएका छन्।

सभाको शून्य समयमा राष्ट्रिय स्वतन्त्र पार्टी (रास्वपा) का मधुकुमार चौलागाईंले दुग्ध विकास समितिमा भएको अनियमिततासम्बन्धी छानबिन प्रतिवेदन कार्यान्वयन गर्न र किसानलाई समयमा भुक्तानी दिन माग गरे।

नेपाल कम्युनिष्ट पार्टी (एमाले) का राजेन्द्रकुमार राईले धनकुटामा सात हजार किसानले दूधको भुक्तानी नपाएको गुनासो गरे।

राष्ट्रिय स्वतन्त्र पार्टीका बसुमाया तामाङले बजारमा पूरा ग्यास सिलिन्डर नपाउँदा उपभोक्ता ठगीमा परेकाले सम्बन्धित निकायले ध्यान दिनुपर्ने बताए।

राष्ट्रिय स्वतन्त्र पार्टीका विदुषी राणाले कर्णाली प्रदेशका दुर्गम स्थानलाई प्राथमिकतामा राखी सञ्चार सुविधा सहज बनाउन आग्रह गरे।

नेकपाका महेन्द्रबहादुर शाहीले कर्णाली राजमार्गको उच्च जोखिम क्षेत्रलाई ध्यानमा दिएर दुर्घटना न्यूनीकरणका लागि लाग्न आग्रह गरे।

नेकपाकै बलावती शर्माले बाँदरलगायत वन्यजन्तुले घरभित्रै पसेर खाद्यान्न खाइदिने र किसानको उब्जनीमा पारेको असरबारे गम्भीर हुन आग्रह गरे।

रास्वपाकै विना गुरुङले घान्द्रुकलाई अन्तर्राष्ट्रिय पर्यटकीय स्थलका रूपमा विकास गर्न आग्रह गरे।

रास्वपाका बुद्धरत्न महर्जनले ललितपुरको बागमती गाउँपालिकामा पहिरो र सडक असुविधाका कारण आवागमनमा हरेक वर्ष समस्या हुँदै आएको जानकारी गराए।

रास्वपाका भरतप्रसाद पराजुलीले भूमिहीनलाई चाँडो लालपुर्जा दिन माग गरे।

नेपाली कांग्रेसका भरतबहादुर खड्काले जाजरकोट भूकम्पपीडितको हालसम्म घर नबनेको विषयमा ध्यानाकर्षण गराए।

नेपाली कांग्रेसका मनमाया विकले दलित समुदायमाथि भइरहेको हिंसा र विभेद अन्त्यका लागि सरकार गम्भीर हुनुपर्ने बताए।

रास्वपाका माधवबहादुर थापाले सरकारी अस्पतालमा मेडिकल सामग्रीका कारण उपचारमा समस्या भएको उल्लेख गरे।

नेपाली कांग्रेसका मोहन आचार्यले रसुवामा निर्माणाधीन जलविद्युत् आयोजनाले प्रभावित समुदायलाई दिनुपर्ने सुविधा नदिएको गुनासो गरे।

रास्वपाका रञ्जु न्यौपानेले काठमाडौँ निर्वाचन क्षेत्र नं. १ मा वर्षाले डुबान हुने गरेको विषयमा ध्यानाकर्षण गराए।

रास्वपाका राजकिशोर महतो कोइरीले क्यान्सर उपचारमा प्रयोग हुने औषधि अभाव हुँदा हजारौँ नागरिक प्रभावित भएको बताए।

एमालेकै रिँगला यादवले सुस्तावासी जनताले नेपाली भूमिको रक्षार्थ खेलेको भूमिकाबारे सरकार बेखबर हुन नहुने धारणा राखे।

बैठकको सोही समयमा सांसदहरू रमेश प्रसाईं, मोहनलाल आचार्य, डा. फिरदोश आलम, रीना उप्रेती (केसी), रुक्मिणीदेवी कोइराला, रुविना आचार्य, रेनुका काउँचा, भूमिका श्रेष्ठ, मनिष खनाल, रास्वपाका राजन गौतमलगायतले स्थानीय तथा राष्ट्रिय समस्याका बारेमा सरकारको ध्यानाकर्षण गराए।

प्रतिक्रिया दिनुहोस !