कर्णालीको मुख्यमन्त्री पदमा नेता शाहीको दाबी पेस

कर्णाली– नेपाली कम्युनिस्ट पार्टी (नेकपा) कर्णाली प्रदेशसभा संसदीय दलका नेता मङ्गलबहादुर शाहीले कर्णाली प्रदेशको मुख्यमन्त्री पदमा दाबी पेस गरेका छन्।

नेकपा (एमाले) को समर्थनमा आज कर्णाली प्रदेश प्रमुखको कार्यालय सुर्खेतमा पुगेर नेता शाहीले मुख्यमन्त्री पदमा दाबी पेस गरेका हुन्। नेता शाहीले आज दाबी पेस गरे पनि प्रदेश प्रमुख यज्ञराज जोशीले उनीहरूबिचको बैठक र छलफलपछि बुधबार मात्रै नियुक्ति दिने प्रदेश प्रमुखको कार्यालय सुर्खेतका सूचना अधिकारी मनमाया काउछाले जानकारी दिइन्।

शाहीले दाबी पेस गर्ने समयमा एमालेका प्रमुख सचेतक टेकराज पछाइको पनि उपस्थिति थियो। हाल कर्णाली प्रदेशसभाका ४० सदस्यमध्ये १४ नेपाली कम्युनिस्ट पार्टी (नेकपा) र १० नेकपा (एमाले) का प्रदेशसभा सदस्य छन्।